عن حملة الغجر ..
كتبت الناشطة المدنية منار عبدالامير شناوة
في اواخر العام 2016 قررت اطلاق حملة مدافعة عن حقوق الغجر وفعلا أخترت الاسم وهو #الغجر_بشر وخططت لاطلاق الحملة واخترت اول محور بالحملة ادافع عنه الي هو حق اطفال الغجر بالتعليم وركزت على قرية الزهور كونها بنفس محافظتي الديوانية واطلقتها عبر بيج جاي وخبز
اول شخص ساندني وساعدني بكل شي ومايزال هو زوجي احمد الشيباني وبعد ما انطلقت الحملة بفترة شجعوني مدونين واعلاميين من بغداد وراها انضم للحملة مجموعة من الناشطين الي،حبو يساهمون او يكونون جزء من الحملة وشكلنا فريق سميناه انا انسان وفعلا الشباب ماقصرو جمعو تبرعات وراحو للقرية ونشرو ع الفيس وحتى درسو الاطفال بمرحلة التأهيل وكل هذا بجهد تطوعي .
وطبعا كانت استجابة انسانية من مدير عام تربية الديوانية السابق عقيل الجبوري دعمنا بخيمتين ورحلات وكان متعاون جدا .
بعدها التحق بنا مجموعة من المعلمين من كل الديوانية واكثر شي من قضاء الحمزة الشرقي واستمرت حملة تعليم وتاهيل،الاطفال ع الفيسبوك وع ارض الواقع خلال هاي الفترة طلب اهل القرية اساعدهم بان يزورهم رجل دين لان هم محتاجينه حاولنا ويا 3،منهم رفضو بس شخص واحد كان امام جمعة بميسان هو الوحيد الي فرح وترك كل عمله وكال هذولي بيهم اجر وثواب عظيم وهم محتاجيني اكثر،من غيرهم وللعلم الشيخ من قضاء المهناوية اسمه عبد الله الخطيب بذل جهود كبيرة بتعليم الاطفال وتوعية الناس ووفر قروض للشباب حتى يشتغلون وبكل خطب الجمعة طالب،بحقوقهم وماتتوقعون جهودة شكد مهمة وطبعا مستمر لحد الان.
وراها تطوعو شباب من مكتب الصدر بالديوانية وايضا ساعدونا بتعليم الاطفال وسوو حملات تنظيف ووزعو حاويات واهم منجز هو فتح مراكز محو الامية لتعليم الكبار وايضا طالبو بحقوق الغجر من خلال المكتب.
وراها اتصلو بيه من مفوضية حقوق الانسان السيد عدي ابراهيم واخذ تفاصيل وتواصل ويا وزارة التربية وبدورها فاتحت اليونسيف وجاءت البشرى بفتح مدرسة حكومية بالقرية بعد حرمان 15 سنة.
وراها بديت بمحور ثاني للمطالبة بحق الغجر بالبطاقة الوطنية الحملة اسمها اين هويتي وطبعا ساعدوني بيها هواي ناس قسم وصلو صوتهم لمؤتمر جنيف بشهر التاسع 2018 وفعلا اجت التوصيات للعراق تتضمن الغاء التمييز ضد الغجر وقسم اشتغلو جماعة ضغط انسانية بالسر وبقينا ننشر ع الفيس واشتغلنا تقارير صحفية ونطالب ببطاقة توحد العراقيين وحق الغجر بيها بدون اي قيد.
وراها زار القرية سيد علي الطالقاني وكان متعاطف جدا وحث اهل القرية على المطالبة بحقوقهم واني رافقته بالزيارة وايضا في خطبته استنكر تعنيف الغجر وحرمانهن من الحقوق وطالب الحكومة بمراجعة نفسها واعطائهم حقهم.
آخر شي وقبل مدة اجه مدير مكتب الصدر السيد هادي الدنيناوي لقرية الزهور بالديوانية واقام صلاة الجمعة وكانت الخطبة رنانة وشديدة اللهجمة وايضا خاطب الحكومتين المركزية والمحلية التشريعية والتنفيذية بمساعدة الغجر وركز ايضا على البطاقة الوطنية وجنت حاضرة بيومها .
كان اكو دور مهم جدا بالحملة باول انطلاقتها للجنة الدولية للصليب الاحمر قدمو مساعدات للقرية لمدة 6 اشهر وقدمو منح ل5 نساء غجريات سون مشاريعهن صغيرة.
وايضا دور بارز منذ سنين للجنة الانقاذ الدولية فبما يتعلق بالجنسية
كان اكو دور بارز لوسائل الاعلام بمساندة الحملة من بدايتها بالتغطية المهنية وكان اول برنامج تلفزيوني،يساند ويستجيب هو صوتك مسموع للزميل سجاد جعفر من قناة العهد.
اريد اكول ان الهدف من اطلاق الحملة هو انساني بحت من اول يوم قررت اطلقها ولحد هذه اللحظة ولا عندي اي اهداف سياسية او مالية ولا حتى شهرة .
ولازم تعرفون انو هواي،تعرضت لضغوطات وانتقادات بس ايماني بالقضية واحساسي بالمسؤولية ودعم زوجي واهلي،والزملاء والناشطين هو الي،خلاني اكمل واستمر وبقوة.
بعض الجهات او المسؤولين صرحو لوسائل الاعلام بانهم اصحاب المنجز وهالشي مابي انصاف لانهم صادرو جهود كل الناس الي صارلها سنين تشتغل ومتحملة التعب والحجي وعايفين التزاماتهم وهم مسؤولين بمجلس،النواب مااجو للقرية غير بس مرتين قبل كم يوم احب،اكوللهم خلو تصريحاتكم تفيدكم لان الناس تعرف ومتابعة منو اشتغل ومنو اجتهد واهم شي رب العالمين يعرف لو مصرحين انكم شركاء كان صار،احترام كلامكم واجب.
بالنهاية كل شخص دعمنا ولو بكلمة فهو شريك بهذا المنجز الانساني.
#الغجر_بشر
#شيل_الكونكريت
حجية منار
